احدث ابداعات الشاعر على فريد سلطان .. قالت اكتب
- Europe and Arabs
- الجمعة , 14 يوليو 2023 4:54 ص GMT
نفسك مسدودة؟
مش قادر تكتب؟
حاسس جواك بركان؟
ارجع اكتب زي زمان
نسينا بعض آلامنا
وأنت انسى كمان
وارجع تاني ابن السلطان!
شايفاك مش قد كلامك!
فاكر؟
كنا بنتألم كنت تقول الدنيا فل الفل بس انتوا عايشين جو الحرمان!
عارفينك مهما وجعتك الدنيا
حتقول انت الغلطان!
عادي اكتب واحنا زي زمان
نشوفك في كل كلامك صادق جداً
وأنت لوحدك
عارف إن كلامك ملهوش عنوان!
اكتب عن حزنك
والا نويت تتخفى
وتتسلى
تعد ثواني أيامك
وتحط الفاضي على المليان؟
قالت اكتب
قول الصدق زي زمان
وانت بتكذب!
وحشاك بلدك؟
طب كلها مسافة تقدر تمشيها ليالي
لو ممعاكش قروش تحجز تركب!
هو كلام ينقال كده وخلاص؟
مش لازم الكاتب فينا
مهما يظن الضحكة ستاير تحجب
ضحكتي خايبة
كاملة وعايبة
وحاضرة وغايبة
سكة سراب
حارجع أكتب ماشي وحاضر
وأسكن جوه عيونك
بس مهاجر
واسمع كل حكاوي الحارة
عبده تزوج
سامح سافر
عبله جاله عريس مالشارع
بس من الآخر
واللحمة والفرخاية بقوا غاليين
يا دوبك ناكل عيش
مالناش عازة للسكاكين!
حارجع اكتب
بس يا ريتك وانتي بتقري
قولي ليتني ما قلت له اكتب
لأن كلامه كما الساكتين!
لا يوجد تعليقات